علاقة مريض السكر بأسنانه وكيفية الإعتناء بها

قام بكتابته د. سمر علي المنوفي في 19 سبتمبر 2016

الحكاية بسيطة, عشان إنت مصاب بمرض السكر لازم تاخد بالك من صحة الفم والأسنان بشكل أدق, هل ده معناه إن اللي معندوش ما يهتمش؟ لا طبعا, بس حضرتك معرض أكثر لمشاكل في اللثة وعظام الفك والأسنان ممكن تفاديها ببساطة شديدة وبدون مجهود كبير
طب خلينا الأول نعرف إيه هي المشاكل اللي ممكن تحصل ؟
- ممكن تتعرض لجفاف الفم واللي بدوره بيؤدي لزيادة نسبة التعرض لتسوس الاسنان, لان ببساطة اللعاب طريقة الفم الطبيعية للتخلص من بقايا الاكل والبكتيريا, لو الفم جاف, كل ده هيكون لازق علي سطح السنة ويبتدي يختمر ويعرض أسنانك للتسوس ومش بس التسوس هيؤدي كمان لتراكم الجير اللي بيكون الخطوة اللي بعديه التهاب اللثة وخلخلة الاسنان!
- صعوبة التئام الجروح وعشان كدة دايما بنسألك " سكرك مظبوط؟" لأن الفم زيه زي اي نسيج في الجسم لو مناعتك ما كنتش قوية وسليمة بما فيه الكفاية أي جرح فيها هيحصل تأخر إلتئام ويؤدي لتلوث الجرح!

إزاي بقي تتفادي كل ده؟
- لازم كمبدأ تكون محافظ علي نسبة السكر في الدم, وتكون متابع بشكل دوري تحاليلك وكمان تكون بتسجلها ومحافظ جدا علي الادوية والاكل والمشي اليومي
- الفرشة والمعجون والفتلة الطبية تستخدمهم كل يوم علي الاقل مرتين في اليوم, ما ينفعش نهائي تسيب اي بواقي للأكل في فمك والا بالفعل اللي هيحصل بشكل سريع جدا إنك هتفقد أسنانك!
- زيارتك لطبيب الاسنان الخاص بيك مش رفاهية, دي زيارة لازم تتم كل 4 شهور, يعني تلات مرات في السنة! تكشف فيها علي صحة اللثة وتتأكد خلو أسنانك من التسوس وكمان تعمل جلسة إزالة اي ترسبات جيرية.
- لازم طبيب الاسنان الخاص بيك يكون علي علم بكل الادوية اللي بتاخدها وجرعاتها
- لو إنت بتدخن يا ريت تقلل, لان التدخين بيزود فرص إصابتك بأمراض اللثة.

هل ينفع مريض السكر يعمل تركيبات؟
نحط الاول قاعدة عامة علي جميع أنواع التركيبات إن لازم يكون سكرك مظبوط ومتحكم فيه بشكل كامل, لان لو ده مش حاصل إنت هتعرض عظام فكك للتأكل السريع وبالتالي اي تركيبة تنفعك بس لازم بعض الشروط
- لو التركيبة متحركة ( طقم أسنان جزئي أو كلي) لازم تكون حريص إنك كل يوم تغسلها كويس جدا قبل النوم وإنك تحطها في كوباية مية فيها مادة مطهرة.
- لو التركيبة ثابتة أو زرعة أسنان يبقي الكلام اللي قلناه فوق ينطبق عليك بقوة, لازم الزيارة الدورية لطبيبك والنظافة العالية جدا, يا إما هتلاقي إنحسار في اللثة والغرسة إتلخلخت من مكانها!
- لو إنت هتعمل غرسة, لازم تكون حريص إنك تسأل طبيبك عن المضاد الحيوي المطلوب منك وكيفية الاعتناء بالجرح بعد الجراحة.
بإختصار شديد, فرشاة متوسطة الخشونة ومعجون يحتوي علي الفلورايد دول تستعملهم علي الاقل مرتين في اليوم. الفتلة الطبية للتنظيف بين الأسنان, مرة واحدة في اليوم. مضمضة منعشة مرة واحدة في اليوم وزيارة لطبيبك 3 مرات في السنة وهتنعم بعدة بفم صحته قوية بالرغم من مرض السكر, يعني إنت بتهزمه بطريقة أخري.








شارك هذا المقال على

العودة للمقالات الطبية