سنة أولي أمومة – الطفل..أول سنة – سنة حلوة يا جميل-

مبروك ولد..أو بنت..أو الاتنين ! من أول ما بنسمع الكلمة دي حياتنا بتتغير و بنحس بمشاعر مختلطة..نعمل ايه؟ احتياجات الطفل ايه ؟ طب هعمل ايه لما يعيط ؟ طب هيتطور بأي شكل ؟

الدكاترة بتوفر لك خطوة بخطوة مع طفلك، من أول شهر لحد ما يتم سنة

الشهر الأول :

الأسابيع الأولي للطفل من أحلي الأوقات ولكن دايماً بتبقي صعبة ، لسة في الأول بتفهمي الطفل واحتياجاته المختلفة اللي بتبقي أولية جدا في الفترة دي سواء كانت رضاعة،تغيير حفاضه أونوم ، ودايماً في مفاجآت لأنه بيتغير بشكل سريع في الأسابيع الأولي و لا ينتظم في أي شيء.

الشهر الثاني :

بالرغم من الشعور بالإرهاق والتعب في الفترة دي، بس بمجرد النظر للطفل بتنسي كل حاجة. بيبدأ الطفل في الفترة دي بالضحك والتعرف علي الوجوه و الأصوات ، و بتبدأ نصايح التدريب علي الرضاعة بالليل بس مش دايماً النصايح بتنفع لأن كل طفل بيختلف عن الطفل الآخر ، و بتبدأ فترة ترك الطفل لفترات صغيرة و الاستعداد لرجوع الأم للعمل . ولابد من استشارة الطبيب المختص لو الأم مش قادرة تتخطي المشاعر المصاحبة لترك الطفل ( تأنيب الضمير-الخوف-القلق-..).

الشهر الثالث:

بتشعر الأم في الشهر التالت ان في حاجات كتيرة حصلت في وقت صغير، و الطفل بيكبر جسمانياً وعقلياً و بيبدأ يستكشف الدنيا و يتواصل مع الأم بأشكال كتير سواء بالأصوات المختلفة أو بالأصابع.

الشهر الرابع:

يعتبر الشهر الرابع بداية العصر الذهبي للطفل. يبدأ الطفل في الانتباه للأصوات و القدرة الجيدة علي اللعب مع الناس، والتحكم في الرأس في وضعيه الجلوس والالتفات لمصدر الصوت.

الشهر الخامس :

بتبدأ قدرة الطفل علي التحكم بالأشياء باليد تزيد،و يقدر يتناول اللعبة بين ايديه الاثنين ، و بتزيد قدرة الطفل علي التنبه لوجود الأشياء ثم اختفائها علشان كدة الالعاب اللي بتعتمد علي اخفاء الاشياء بتبقي ممتعة جدا للطفل في الوقت ده . بعض الأطفال بتبدأ عملية التسنين بدري علشان كدة لازم الأم تاخد بالها لو ظهرت أي علامات . وممكن الأم تبدأ تجرب مع الطفل عملية الشرب من الكوب مباشرة مع الملاحظة المستمرة و المتابعة.

الشهر السادس :

وصلنا لنص الطريق،دلوقتي عند الطفل القدرة الكاملة للعب، الإشارة، التلويح، وتذوق كلي شيء في محيطه. بتنمو عند الطفل القدرة علي التوازن والزحف علي الأرض. و ينتظم بعض الأطفال في الفترة دي في النوم ليلاً.

الشهر السابع:

فترة تكرار الأغنية المفضلة عدد لانهائي من المرات ☺ ، بتبدأ تظهر تفضيلات الطفل و الأشياء اللي بيحبها ومحاولاته المستمرة للإعتماد علي النفس والقيام ببعض الأشياء بنفسه و بمفرده ،بيبدأ يفهم بعض المصطلحات ( باي باي – تعالي-..)

الشهر الثامن :

بيبدأ الطفل فترة مليئة بالحركة و تتسم بالفوضي في المكان لرغبة الطفل في الحركة الدائمة واكتشاف الأشياء، وهناك العديد من الحيل لإحتواء تلك الفوضي دون التأثير علي حركة الطفل و رغباته ، و بتظهر أيضاً بعض الحركات الاستكشافية للاعضاء الجسدية المختلفة و الأعضاء الجنسية خاصة.حاولي تصفي ذهنك و تستعيدي طاقتك دائماً لأن الطفل دايماً محتاج لطاقتك ☺

الشهر التاسع:

بيستوعب الطفل تعابير الوجه و الأوامر المختلفة البسيطة و تقليد الأصوات. وبتبدأ مرحلة جديدة في التغذية ،ولابد من متابعة الطبيب للتعرف عليها.و بيبدأ ظهور نظام نوم الطفل المفضل من حيث عدد الساعات و الأوقات المفضلة للنوم

الشهر العاشر :

يتعلم الطفل تسلق الأشياء قبل تعلم النزول منها ! لذا وجب الحذر في تلك الفترة حيث تبدأ الحركات في ازدياد خاصة مهارة التسلق ، وقد يستطيع الطفل الوقوف بمفرده للحظة .

الشهر الحادي عشر:

بتتطور كل المراحل السابقة وبيبدأ الطفل في تذكر الصور و علشان كدة قراءة الكتب و القصص مفيد جدا في الفترة دي ولاداعي للقلق فالأطفال بتختلف عن بعضها في الإهتمامات و التطور، و دايماً الرجوع للطبيب هو الاختيار الصحيح. و تذكري دائماً أن أفضل طريقة للطفل لاكتساب مهاراته أن يكتشفها بنفسه و ببعض المساعدات من المحيطين.

لو محتارة تتابعي مع دكتور أطفال شاطر ممكن تقري ازاي تختاري أفضل دكتور بالنسبة لطفلك من هنا أو تشوفي تقييمات وترشيحات الأمهات لأشطر دكاترة الأطفال من هنا